منتديات ابناء منطقة الهدى

اهلا بك ايها الزائر الكريم شرفتنا ونورتنا يزيارتك.
ملحوظه : عند التسجيل الرجاء كتابة الاسم الحقيقى كاملا
(لا للاسماء المستعارة من اجل مزيدا من التواصل)
و نرجو ان تجد ما هو مفيد


مرحبا بك يا زائر نور المنتدى بوجودك
 
الرئيسيةالبوابةمكتبة الصورس .و .جبحـثالأعضاءالمجموعاتالتسجيلدخول

معا لترقية مستشفي الهدى معا لترقية مستشفي الهدى معا لترقية مستشفي الهدي معا لترقية مستشفي الهدى

المواضيع الأخيرة
            goweto_bilobedلكم التحية اين انتمالثلاثاء 18 يوليو 2017 - 4:15 من طرف عزالدين حسن محمد            goweto_bilobedعودة بلا خروجالسبت 30 أبريل 2016 - 14:06 من طرف صديق الماحي            goweto_bilobedسلام مربع السبت 30 أبريل 2016 - 14:04 من طرف صديق الماحي            goweto_bilobedد/تهاني تور الدبة تدق أخر مسمار في نعش مشروع الجزيرةالخميس 25 فبراير 2016 - 1:14 من طرف عادل خياري            goweto_bilobedمعا لترقية مستشفي الهدىالأربعاء 10 فبراير 2016 - 17:58 من طرف عادل خياري            goweto_bilobedهل يمكن رجوع المنتدي لي عهده الأول الثلاثاء 9 فبراير 2016 - 0:21 من طرف عادل خياري            goweto_bilobedالدلالات الرمزية في مختارات الطيب صالح: "منسي: إنسان نادر على طريقته!"الإثنين 26 أكتوبر 2015 - 18:22 من طرف الصادق احمد محمد امام            goweto_bilobedتحية بعد غيابالسبت 24 أكتوبر 2015 - 5:17 من طرف صديق الماحي            goweto_bilobedتهنئة بعيد الأضحى المباركالجمعة 25 سبتمبر 2015 - 20:00 من طرف صديق الماحي            goweto_bilobedشباب المنتدى المستشفى يناديكمالأربعاء 16 سبتمبر 2015 - 18:36 من طرف عادل خياري            goweto_bilobedتوحيد خطبة الجمعه لنفرة المستشفىالأربعاء 16 سبتمبر 2015 - 18:20 من طرف صديق الماحي            goweto_bilobedدكتور اسلام بحيرى وتغيير الفكر الدينى السبت 15 أغسطس 2015 - 5:16 من طرف صديق الماحي            goweto_bilobedمعقولة بس ... فى ناس كدة الخميس 13 أغسطس 2015 - 12:38 من طرف عادل خياري            goweto_bilobedيعني نسيتنا خلااااصالخميس 13 أغسطس 2015 - 12:35 من طرف عادل خياري            goweto_bilobedبيت البكى ااااااااااالثلاثاء 4 أغسطس 2015 - 6:59 من طرف عزالدين حسن محمد            goweto_bilobedالحاجه فاطمه بت النذير في ذمة اللهالثلاثاء 4 أغسطس 2015 - 6:49 من طرف عزالدين حسن محمد            goweto_bilobedمتجرسيييييييييييييييييين رمضان الإثنين 13 يوليو 2015 - 12:03 من طرف صديق الماحي            goweto_bilobedحقيقة الكيزان الثلاثاء 7 يوليو 2015 - 0:55 من طرف صديق الماحي            goweto_bilobedشتان مابين رمضان هنا ورمضان هناك الأربعاء 1 يوليو 2015 - 22:08 من طرف صديق الماحي            goweto_bilobedشمس رمضان دي اظنهاالسبت 20 يونيو 2015 - 18:31 من طرف عادل خياري

شاطر | 
 

 حلمنتيش وحلمنتيش

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: حلمنتيش وحلمنتيش   الخميس 27 مايو 2010 - 16:27

هذه نافذة للشعر الحلمنتيشى
نبدأها بالدكتور محمد بادى فى رسالة كتبها لأمه ردا على جوابها
جواب لبت الخير
محمد بادى

بت الخير يجيك الخير وصل جوابك الكاتباه لى الولد الحتالى
وكان الظن ترسلى لى هين هينين من البركاوى داك الطعمه حالى
وتكتحى فيه قبضات من نبق سدرتنا فى بدل التسالى
وكان بالقرش وحتى الدوم هنا والله نيئ ومسيخ وغالى
سؤالك يمة عن احوالى كان شفتيها تغنيك سؤالى
انا اتوكرت فى قلب البنادر زى غريق شرقان مدلدل فى الدوالى
جات شايلانى حرة جوف وانا أتحديت مجالا مو مجالى
مصائب الجامعة أكبر من الشفتو ولا سمعتو فى ايامى الخوالى
قعاد الكرسى كان شفتيهو ورم ساقى زى سيد الزلالى
اقلب فى الدفاتر من صباحا لامن تمسا ما بنسى انشغالى
واسوق الليل تحت ضوء الكهارب ديمة هارب من فراشى وهادا حالى
دة كله شان اجيب لى نمرا انافس بيها واستر بيها حالى
حالتا ما بتسر البال ومن يوم ما انهديت ما انسر بالى
سلاطين العلم يا يمة ينسوا العشرة فى فد يوم ويدفروك برة زى دفر الطبالى
وخائف من اجيك مرفود وهادى الفكرة من ما جيت معشعشة فى خيالى
واخير افتح أضانك قبل ما تلقينى فوق اضنيا ملويات حبالى
وكان حصل القدر يا يمة لا تلومونى ذنبى على البنادر خيرها اقوى على احتمالى
وخائف تنبهل قربى الملآنة وينكسر سرجى وكمان تطفش جمالى
......................................
بناتا فيها رويانات جسومهن بالدهون تلصف بلا جسوم السحالى
كتوفهن ما بقول عكف السروج لكن بشوف فيهن مخالى
سبيبهن ديمة بالحزم الكبار مهدل فوق قفاهن وا حلالى
صدورهن طامحة زى موية الدميرى الهايجة تكشح فى العلالى
عيونهن واسعة تبلع مية زى ولدك وتشرك للموحد والضلالى
وما بتكسر وحاتك ساعة أقيف قدامها انكس راسى بى قدرى وجلالى
ومشيهن سوا زى سرب الغزال لكن نفورهن ما غزالى
وقصاصهن ينقر بي عصايتو وما يفرق دربهن من بين دريبات القمارى
عدادهن ما بخبرو الا وين ما أمشى بلقاهن قبالى
والمآسى كتيرة حاصلة المكضب يلاقى بوليس السوارى
دى حالتا بقدر است تر معاها خلاف احاكى الناس وأبارى
وانتو راجين يوم اجيكم بي شهادتى وينبسط اهلى وكبارى
وبرضو خائف من اجيكم بى غريبة وفى خجل قايد صغارى
والقدر بي غادى كاتب لى شيتا لانى حارى ولانى دارى
....................................
حاجة واحدة تكون فى علمك انى جائى وتانى راجع لى ديارى
ويانى حميد القديم الا بس فاقد حجابى وضاع سوارى
.........................
يمة كترى من رضاكى وسلميلى على المعاكى
سلميلى على جروفنا وحتى وزيينا البكاكى
وقولى لى حبوبة زيك نحن شبنا وماك براى
وكان سألتو انا حالتى عايمة لانى ضاحك ولانى باكى
....... ...............
سلميلى على بناتنا وقولى ليهن مانى ناسى
طارى شلاخا مواسا زى شقيق بيتا سداسى
طارى نقشا فوق خدود وبين ضفائر وشوفو قاسى
جسمى فى البندر ممدد الا بينكم بي حواسى
.................... . ....................
سلميلى على البكادم والبشتت فى التقاوى
فى الكرت محراتو قالع وصوتو فوق تيرانو عاوى
سلميلى على الضرائح والفضل من الخلاوى
والفقير الفوق حصيرته يكتب البخرة ويداوى
............................ ....................
مع السلامة ودعتك الله ولى شفقتك مافى داعى
لى وصيتك مانى ناسى ابقى عشرة الراعى واعى
فى بحور أهل البنادر من زمن طالق شراعى
كان نجحت بجيكى غانم وكان فشلت بجيك ضراعى



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عثمان الشريف
 
 
avatar

عدد المساهمات : 173
تاريخ التسجيل : 02/05/2010

مُساهمةموضوع: رد: حلمنتيش وحلمنتيش   الخميس 27 مايو 2010 - 18:41

الله يكرم ياصديق ودبادي علم لكن ماعارف ليه شامي فيه رئحه اسماعيل حسن ود حد الزين
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   الخميس 27 مايو 2010 - 20:00

ود الشريف كيفك واخبارك والتحية لجميع أفراد الأسرة الكريمة
اسماعيل حسن هو فعلا أستاذه وقد قال فيه مرثية جميلة ما متذكرها
ومطلعها يقول
أرمى الدمعة فوق الدمعتين ياعين وبعد الليلة حابساها الدموع لى مين
وهى قصيدة طويلة
شكرا يا حبيب على المرور
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمد الطيب ابراهيم
 
 
avatar

عدد المساهمات : 3342
تاريخ التسجيل : 29/05/2010
الموقع : مستشفى الهدى
المزاج : الحمد لله

مُساهمةموضوع: رد: حلمنتيش وحلمنتيش   الجمعة 30 يوليو 2010 - 10:06

تشكر ود الماحي
انت اظنك كان بتقعد مع ناس فرقه تيراب
ولا محمد موسي لاقاك
ابداعات رائعه عقب لينا تاني
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمد الطيب ابراهيم
 
 
avatar

عدد المساهمات : 3342
تاريخ التسجيل : 29/05/2010
الموقع : مستشفى الهدى
المزاج : الحمد لله

مُساهمةموضوع: رد: حلمنتيش وحلمنتيش   الأربعاء 25 أغسطس 2010 - 18:44



حلمنتييييييش


يا سيدة لا
فايتانا وين مستعجلة
الجامعة بعدك كوم رماد
لا فيها طب لا صيدلة
غلطات كتيره الكمبيوتر بعملها
يمكن نسي ويمكن سهي
وجاط النمر من أولها
ما قالوا بعرف كل شي
ليه ما عرف ست الحلاه
فايتانا وين مستعجلة
القمرة وكتين اختفت
روحنا ليها بنسألها
قلنالها ليه يعني الغياب؟
ساعة الضلام أيه طولها
قالت خلاص بأرضكم مالي صله
وفي شان سيدة
كت بجي للديار وأجملها
فايتانا وين مستعجلة
يا السيدة ... لا
يا السمحة ... لا
فايتانا وين مستعجلة؟
الجامعة بعدك كوم تراب
مالو العميد
مالو البليد
ما يرفد المصحح والمعيد
ويخلى ست الكل
تعيد
يا سيدة لا
يا سيدة لا فايتانا وين مستعجلة
شرط امتحان؟ ما إنتى كملت الحلا


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عادل خياري
 
 
avatar

عدد المساهمات : 4004
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   الجمعة 3 سبتمبر 2010 - 5:55

سلام اخونا محمد
سيدة فاتت الجامعه وفاتت السودان وهي الان بلندن
ومازالت حديث الناس وكم حاولت ان ارى هذه السيده في زيارتي للندن ولكن لم يسعفني الحظ
قصيدة جميلة
تشكر يامبدع دوما








اللهم اجعل اخر كلامي لااله الا الله
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عادل خياري
 
 
avatar

عدد المساهمات : 4004
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   الجمعة 3 سبتمبر 2010 - 6:00









اللهم اجعل اخر كلامي لااله الا الله
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمد الطيب ابراهيم
 
 
avatar

عدد المساهمات : 3342
تاريخ التسجيل : 29/05/2010
الموقع : مستشفى الهدى
المزاج : الحمد لله

مُساهمةموضوع: رد: حلمنتيش وحلمنتيش   السبت 4 سبتمبر 2010 - 11:37


رسالة بليغة من أهل العوض مخصوصة




للإبن الظريف ود المدن ود موسي
بدور رد السؤال لو باللغة المهموسة
فينا نقيصة ولا الصورة جات معكوسة ؟

جبتا الفتنة تعلن حرب بى جاسوسة
والسبب الفنيلةالقلت في الوسخ مدسوسة
نحن نفوسنا في بحور العفاف مغموسة
مية غمسة لاعار لا دنس لا سوسة

نحنا أهل العوض والعزة ما بنكوسا
أصحاب سمته وأصحاب فرسةً
نحنا أنعامنا بتعاف ترتع المعفوسة
ونحن جدودنا عادي بطيعوا الجاموسة

إيانا أهل العوض أهل النحاس أب رنّة
أهل البَدر ة والمهيوب وأهل الشنّة
أهل عزة وأهل سمتة وعروض ومحنة
ناس البادية ناساً عشرتن تتمنى


نحن أهل العوض حافظين عهود ما خناّ
وللجار و العشير بالشينه ما تعجلنا
بيوتنا مسيد ضيوف زمن العدم ما بخلنا
وما بصح الوليد في أعرافنا يجاهلنا


ونحنا أهل العوض والله لاتقينا ولا تبدلنا
واثبين كالأسود من واجبة ما اتماهنا
في البر في البحرتلقانا وين ما كنّا
في قمم الرجال كذب البمِس لى حصونّا


ونحنا أهل العوض في الحالي و الفات كنا
قج شرك الكلا م في مشينا ما بعطلنا
بس بوعيك أكان دقس في أصولنا ومتجاهلنا
نحسب في الجدود ستين ومن غير إنََّ


ونحنا ربّونا الشياب فوق ماما ماتعجنا
حافظين لسان حافظين كرامة أهلنا
أشبال من أسود في ضبعة ما تهجنا
سايرين سير كرام لامن نلاقي اجلنا


ونحنا ذاتنا يا ود موسي ما بواخذونا بي بنولـِّد
و الـما عندو رأي حقو يتبع ويقلد
لو ما مخـّك المخمود وحسك المتبلد
جامعة موسكو ما جابت دكاترة تولد ! ؟

ما راعيت شعور الناس شعورك فاترة
بتسيء للعزار أهل السيوف الباترة
أَمَانةً تَدخنك شطة ودموعك قاطرة
ما سمعت بالولادة أتخصصولا دكاترة !؟

نحن والله عرب وأولاد عرب لينا الشرف والعز
بنسرح بالرزق نحلب نصـُر ونجز
ويوم الحارة والعركة السلاح برز
ثابتين كالجبال الشامخة ما بنفز

المخسوفة والمرقوعة ياها لباسنا
المجلوبة والمقنية من ميراثنا
الجار والعشير من الكتف لى راسنا
في المال والعروض تخشى الملوك من باسنا

ليه يا ود موسى بتذم الرجال بالعايلة
ما بعشّوا الضيوف تحت السحابة الشايلة ؟
ما سمعت في أم همج كاكوم عقيد الزايلة ؟
ما سمعت بالنمر حرق الخديوي القايلة ؟

لكن لسانك فك يا إبني أصلو مابتستامن
تشحن في النفوس من الغبينة مُداماً
بس سمة المن مثالك في البحر بترامن
العربي إن رقص ألبل قرونن قامن

دحين ياخي رغم الغطرسة بالتمثيل وحبة كاشك
تلقى أصفارنا أكبر من مساحة داشك
شبعانين طحين من الفطير ودراشك
أخير تبعد بخاف من شوكنا يخرب شاشك

ومهما زعمت من عزة ونفخ فشفاشك
أعلم طينّا أنصح من تراب خشخاشك
شوف ليك ناس رخاس تاخد عليهم فاشك
أول غلطة كان تنيتا بنعل خاشك


دحين ياخي اولاد عرب والغير عرب كلهم أخوانك
إحذر واكترث شكل قوافي لسانك
والرمي فوق الجماعة بالتعابير خانك
في نص البحر بتدور تقج صيوانك ! ؟

نحنا نضافنا يا ود موسي مو صابون
نحنا نضافنا فى عروض وشرف مصيون
نحنا نضاف ضراع بالدكري المسنون
طيبين عُشرة ولكن للخصيم طاعون


نحنا سماحنا يا ود موسي مو كريمات ولمعة لون
نحنا ولدنا عاشميق عكس للعرجون
نحنا ناس لينا أعراض بيحكما القانون
سماحة الزول يفرّج كربة الممحون


نحنا دفعنا يا ودموسي ما جركان
ونحنا ما بندفع الجبنة وحليب الكان
ونحنا دفعنا فى النوق أمات سناماً بان
نحنا ضربنا للعوق انفجار بركان



وكان كلمنا يا ود موسي بنقول الكلام حقاني
وكان غنينا بنخت الشعر فى معاني
عزيزين فى النسب من ذلة مابنعاني
نحسب فى الجدود ستين ومن غير عاني


دحين يا غبار الكبرياء المن المعالم حاجب
أحذر منّوا لا ينسيك حقوق الواجب
ومن أمثال تراثنا الفي العرف والواجب
مهما العين تطول مابتعلى فوق الحاجب

وعشان ما نغلط معاك ونشيل النقط من شينك
أوعى تعضعض الناس البوضحوا شينك
هسع وقعت في الحلة ووجب تكشينك
شن ودّاك لشعراء البطانة تشينك

دحين ياخي الطامع في كثيرة الغير قليلتو تضيع
وسيد بيت القزاز ما ببدأ بالجديع
بولاد الحديد القاسي في القطيع
العربي إن حرن وسط المحاص مابطيع


نحن والله لا بنخاف لا بنعاف ولا بنتهدد
لا بنكل ولا بنمل ولا بنتردد
كمان للزول البخون عُشرتنا ما بنتودد
نبقالو البلا في كل فِجَة مَمَدَّد

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 14:46

هـــوى يـا وليـــد


شعر د. محمد سعيد ولد بادي العكودابي
هوى يا وليد يا دلوعة يا مرنوعة
أعدل إيدك المفدوعة
واتلحلح واقيف دغرى وواس صدرك
مع صدرى واتشدّع
ليك الحق
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين
وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع
الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع
هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا وحد المويه فى الغرغور
ود ابن ادم المسكين نجاتو تحت قرون التور
والعوتيب يجيك يجرى يشيلك وانتى ما بتدرى
وما بيرفع
هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
وكان حجازو مد الليد بتسمع كع
هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للحيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 14:53


يجيك الحول وحول بي زول والزول غول
ونحن تعابا نحن غلابا لا نقداً ولا محصول
هيا قشاره ما معقول يا فقاسا ما معقول
عليك عزينك المبهول تضربي الجملة بالميت قداحة فول
وعيشة تقول ضنيب ام سيسي عرض وطول
جاز اللمبة في غلبة حق الفطرة للطلبة وركوب التكسي بالقلبة
لولا الروح بقت سلبه نمص الصلصة من علبها
وكانت جاتنا في الرقبة
ده كلو كوم وتاني ام العيلة كوم
الولية الفنجرية حلاوة نبق
الولية الغجرية ودايرة دق
البطن منفوخة ديمة طبق طبق
يجيها الحول وحول بي زول والزول غول
ومره تديها الهوادة وترمي زي زولين زيادة
الله أريت الزول يزاول
يا حكم صفر دا فاول
البطن بت اللذين ودايرا تعمير القبايل
اب شنب تعبان وعرقو يسيل جداول
يلحس الكوع رغم أنفو وكان مقاول
وياما يشبع في البشاتن
وياما يشبع في البهادل
شايلة فوق الصفحة سوسو واحد الله
باليمين مقيودة سيسي مالو تاني
اب شنب شايل أماني تلاته بركة
وكل حركة معاها بركة
وفي البطن بنجوس يفرفر
والقطر بي وراها صفر
والله يستر
شوف كمان جنس الفصاحة
والفتاوي الماها صاح
نحن عارفين الله اعظم
والرزق بنزل مقسم
للبجاهد والمعسم
والله ما شقّالو حنكاً ضيعو
والله ما سوالو طفلاً ما سقاهو ورضعو
إلا أسمعوا يا رفاق
الرضاعة خشم بيوت
والرباية خشم بيوت
والمعايش ماها توت
والمعذب أخير يموت
الوليد إن كان مبرجل شن بسوي
زي كليب جربان يهوي
لا يبهرج لا يضوي
الوليد كان يربى قوي
عمله إسترليني سايرة يبقى صاروخ ارض جوي
النجاح مو من كتير
والكتير البشبه العزين يطير
والبطير من أرض جاعت كان أخير
وأخير أجيكم بي بشارة وقولوا خير
الله لا يخلي الخواجة
ما تقيف قدامنا حاجة إلا يرطن فيها حاجة
يا خلق يا عقل صبة
تلحسوا الرز بالمربة
وتلدوا كُبّة وراها كُبّة
عشان تقيف ما تاخدوا حبة
إنتي يا جاموسه دري
هو اليكتح وانت ضري
الليلة يقطعوا حبلي سري بكرة يظهر حبلي سري
العداد ماسكاهو سري
لا تحدثي لا تقري
إلا تنشري وتدري
ويله يا دايتنا جري
انه قول المعري: خفف الوطئ خليلي هاهنا قبر سليلي
جمي جمي وبكره تمي
ويلا يا نخلاية أرمي
أرمي أرض الفول وسمسم وخلي ملك الموت يلملم
حبه يا أهل المحبة
حبه واحدة مع العشية
حبه في جوف الولية
والمصايب هية هية
لا بطوناً كالخيامة
لا سمايا ولا قيامة
لا شرابا ولا طعاما
قد تقولون حراما
لست مفتي
ولماذا لست أفتي لست أفتي
شيخنا ود الشايقي خريج الخلاوي
يعشق الماحي وطارتو والمدايح واب كساوي
قافل أضانو من الخلايق لا مصايب لا بلاوي
إلا في عرّس وطلّق قد يجيب بعض الفتاوي
حالتو ساترة ونص كم
أسطة في سوق السماسرة
بيعه رابحة وبيعه خاسرة
وهو حامد متشكر
غير ملحد غير متنكر
يمشي ما بين السراري
ونساوينو الحواري لا تغيب عن قلبو ابداً
حاجة سعدة لجنه خردة حاربت في المهدية
وهي آلت لجلافط وكراضم عن قريب ستزور الأبدية
وأحيلت للمعاش فاستراحت وأراحت
ثم تأتي علوية وهي رهن الخدمات
ومفاخر ومباخر وعيوناً فاهمات
تعرف الوقت المناسب وتُحاسِب وتحاسَب
ليس في الدين حرج
آخر العنقود ليلى اصغر الزوجات ليلى أفخم العينات ليلى
شيخنا ود الشايقي أفلح اشترى ليلى مكعكع فتصلح
وتصبين وتلحلح وهو شيخ متصوف في هجيع الليل يمدح
يا ليلى ليلك جنا معشوقك نوح وأنّا
وتجيب المدح ليلى وتهرول غير هدنة
وتزيد الشيخ قرباً قاب قوسين وأدنى
إنها دنيا المقالب باسم ليلى من يطالب لست ادري
ذات مره والممرات كثيرة شيخنا صلى الصبح نافلة وبآيات قصيرة
وتحوقل وتعوذ ودعا الله بان لا يتجوز
ثم ترجم ثم تمتم وبرأس السبحة طقطق وتشهق وتمطّق ثم نقنق
ومضى يتلو الكتاب
مر بالمال والبنون فتبسم وتنسم
ثم آيات الطلاق فتجهم وتعسم
ثم آيات الزواج فترنم
فإذا ما لاقى مثنى وثلاث ورباع
وقف الشيخ طويلاً مثلما فحل الضباع
وبكى ملئ الجفون البقرية
وشهيقاً كالدجاجة البطرية
قال يبكي وهو يرخي بالحبال الوترية
إنها عين الشماتة فانا لا املك غير تلاتة
إنني قصرت في حق الكتاب
سأُعاني ما ألاقي من عذاب
أين مني زوجةً بكراً فتية
أين مني المحلبية والسرتية والعطور الأجنبية والعطور البلدية
في نقاء كبحيرة طبرية
ثم قال استغفر الله وطفر وتحفحف وتعطر وتقيف يتبختر
يسأل الله عروسة ثم حشش بعباية وزناد وكدوسا يمشي من غير فرامل وتروسا
خطفاها خطفاها
جات ضحية سمينه هايلة ومدهنة
جزار وفالح في تجارة القرصنة
خلف الكراع فوق الكراع وكدوسو زي المدخنة
بين كفتين زي الخشب حرق شباب السوسنة
وتفوت سنة وتدخل سنة
شيخنا خلى الميضنة
يوم هناك ويوم هنا
وبقى في الحرد والطنطنة
وهو زاتو عجّز وإنتنى
شيخنا يا الشيخ البجم
ولد زرازير السجم
وحدين أساميهم عرب واحدين أساميهم عجم
بدا بي محمد ثم زوجات الرسول العشرة
وكل الذين تجمهروا للبيعة تحت الشجرة
طلحة الخير والزبير ثم سعد وسعيد ثم ستة مبايعين
وكمل أسماء الصحابة وكرام التابعين وتابعين التابعين
والنجوم البارزين وأسامي الخالدين ثم عبد ما يشاء من البنين
عبد المقيت عبد المجيد عبد الحسيب عبد الجليل عبد المعين
ثم سمى في الختام عبد مالك الملك ذو الجلال والإكرام
ثم نوع في القوافي وتبحر في تراكيب المضافي
شمس الدين ونجم الدين وقمر الدين وقمر صناعي الدين وسيف الدين وزحل الدين وبحر الدين وعاد لا وين
وآخر الدور بقت الوحدة تفقس في تمانية شهور
ولدة أناتي جوز فوق جوز وولدة ضكور
الراجل تقول مسحور
ومابخليلو مرةً بور
وزراعتو ماب تقع واطة
بعد حولين يزيدو على أهل مالطة
وشيخكم عاد قعد باطة
يكتب الطلبات لست والمقاسات بالدست
لحسو قدر العندو ست حتو درج الخزنة حت
الولية تنبح ما اتكست
البت تدور إن أصبحت وإن كان مست
جيب خرايط وشرايط وهياكل وسلاسل ولطايف وعرايس وغوايش
ومحزق ومنمق ومفستق وجوارب وأكما وأراضي وسماء وهلما وهلما
إنها نكبة روما والمتمة
إن طعم العرس حلو ولذيذ وهو راحات وأقداح نبيذ
والخوازيق ستأتي وانتفاخات القرنتي ثم ضربات البلنتي
وبطناً كالنمتي لا تقاوم بالتونتي
إنت تصرخ بنتي بنتي وهي تصدح حني حني وستي ستي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 15:08

الحلمنتيش الجاي دة منقول كما هو
لم يكتبوا اسماء الشعراء
نقلناه كما وجدناه من موسوعة حلمنتيش
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 15:10

(]بوش السودان الحبيب) .



الاهبي ببوشك شبعينا -------وجودي بالطعام لجائعنا
نريد لدفس البطن بوشا------نكون باكله كالمجاهدينا
ولن نرشي سواه و لو بلحم—فلسنا في اللحوم بطامعينا
اذاما لاح طيف اللحم يوما---نبحلق فوقه لااكلينا
(ننونو)كالكدايس عند لحم-----وننبح كاكلاب مشاكلينا
فيا لحما يقد الجيب قدا------كفاية مغصتك السويتا فينا
فان بطوننا يا لحم ابت------علي الافوال بعدك ان تلينا
تمطقت الخشوم لاكل بوش—تدنكل بالشطوط و الطحينا
وزغردة البطون لاكل فول---تصوت تارة و تحوط حينا
اذا ما البوش جهز فوق صحن—تخر له الاصابع ساجدينا
وتركع في نواحية الايادي -----يصوم عن الكلام (البوز) فينا
سلي عنا المطاعم في البراري ---سلي الفوال يخبرك اليقينا
بانا نورد المعدات جوعي -------و نصدرهن تخما قد كفينا
ونشرب اذا شربنا الشلي طاعما---ويشرب غيرنا كدرا و طينا
وان سوف تذكرنا السفاسف -------مدنكلة لنا و مسفسفينا
وان غدا وان اليوم اكل------------وبعد غدا نكون الاكلينا
فما شر السفاسف ام ليلي ---------اذا كانت مدنكلة تجينا
يزين صحنها بصل و توم -------وماء الجبن لاح لناظرينا
مدنكلة كان الزيت فيها----------اذا ما الماء خالطها سخينا
فاني قد خبرت الاكل دهرا------وخضت غمارة طورا و حينا
بفتيان يرون الاكل مجدا -------و شيب في الطعام مجربينا
نسفسف ما ترضي الناس عنا ---ونهجم كالاسود اذا دعينا
فبوش قد اكلت بسوق بري -----وفول قد اكلت بطور سينا
هبشت الجيب بعدها –بكيت----يرن امام صاحبة رنينا
فما حظ المفلس غير شوم ----يعيش العمر مكتئبا حزينا
اذا ما كان بالامكان يوما-----اعبي الجيب اجعله متينا
لكنت ملات هذا البطن لحما---وهامبيرقر و تفاحا و تينا
لصرت مفتل العضلات ماكن----و منتفخ الجضوم فتي سميتا
و كنت و ليس بالامكان هذا -----وكنت حسبت هذا الفول طينا
اراني قد فطمت بماء فول ----- ولسنا لبيرقر بمناسبينا
فهل عربية الجازولين تمشي ؟ اذا كبولا يوما موية
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 15:11

Defaultn]]
ياااكل البوش كل لحظة لك تهانينا
ولتيتو تجدنا مهنئينا
فما اجمل طعم بوشك وبوش أمريكا اللعينا
جن جنونه يوما لاننا ببوشنا في السودان شبعانينا
وبوشهم زله العراق ومن الافغان اخوانا مجاهدينا
يا لحظك ياتيتو ببوشك ففي غزة الاطفال موتي جائعينا
وفي الخليج كبسات وللبعير شاوينا وفي حكام لاطفال غزة محاصرينا
أبعد هذا بالبوش هناء سننام بالاحزان من أجل غزة متوكلينا
نفاج بالفرح نغزيه وقلم الابتاوي عن غزة من المدافعينا
فكيف نشبع ببوشنا
وبوشهم بكبر كروشنا من الفرحينا
سنشبعيوم نري في بوشهم يوم بدر
ونهناببوشنا اجمعينا[/b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 15:17

Default
في الليلة ديك
القصة ذاتها بقت عليك يا عبدو وأدوك الشريط
يوم قولنا ليك أنضم معاها وكلّمها
لكن أبيت تسمع كلامنا
بقيت لميض وقلتَ.. أحسن أكون تقيلأ
نا يا جميل باكر بعد باكر
بكهربها ليك بي نظرة
كتيل وبقيت تقيللا
من سقوك موية الغسيل
يوم جيت تنطط زي زمان
وتباري بقعور الشجر
كايس كراسي الخيزران ..
وقعدتَ يا زينة الرجال
كهربجي قال رفعوا الستار
والبت تجي وتمشي و تلف
ومرات تقيف ومعاها كان زولاً حريف
والوقفة كان وقفة ولف
وصاحبنا بالاحساس عرف
وسألتَ والناس كلّموك
ملعون أبوك دنيا أم قدد
بقت البقت ووقعتَ في شارع الزلط
تبكي وتجعّر والعيون اتورّمت
يد القميص.. ضهر القميص.. كم القميص
حتى الفنيلة اتشرّطت
يا عبدو عيب قوم يلا صلي على الحبيب
الواطه صبحت داير ننوم
يا أخوانّا لأ أنا عايزأموت
أقع البحر يا عبدو عيبا لدنيا حر ..
والموية بتسخّن عليك
ثلاثة ساعات في الطريق
وزولنا قاعد يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
شي كلام عن الدنيا أم قدود
وعلاقة بين يوما لسبت وعين الحسود
ومقارنات بين الجمال والجهل وسوء الإختيار
قال شينة قال ...! قال شينة
قلنا كلام صحيح و خطيبها زاتو ولد قبيح
بس ياخي قوم الواطة ليل..
دايرين ننوم
قام تاني جاب سيرة البحر
وقام تااااااااااااااااااني جاب سيرة البحر
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
صديق الماحي
 
 
avatar

عدد المساهمات : 3466
تاريخ التسجيل : 25/04/2010

مُساهمةموضوع: رد: حلمنتيش وحلمنتيش   السبت 22 سبتمبر 2012 - 15:19

Default
سلبطة !! شعر حلمنتيشى!!!!
بحبك
منو القال ليك بحبك
حصل شفتيني اتكبكبت ولا جريت انا في دربك
ما ساكت قدر مكتوب كان جابني وقعد جنبك
ولمن كان بعاين ليك
ماعاجبني لون عينيك
ساكت كنت بتسلي
وبفكر في خلقة الله
وقادر انت يا الله
كيف خلقك وكيف رسمك وكيف سواك قوريلا
ورقبتك ناطة منسلة
وراسك ذي غطاء الحلة وكلك توب وباروكة
ياملوخية مفروكة
وبرضك تاني ليكي امل
برضو تقولي شاغلتك اشاغلك ليه رماني جمل
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 

حلمنتيش وحلمنتيش

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات ابناء منطقة الهدى :: المنتديات الأدبيه :: الشعر والنثر-
انتقل الى: